KAWRUH BASA

A.    UKARA TANDUK (AKTIF)

Ukara tanduk yaiku ukara sing wasesane oleh ater-ater hanuswara (an-, am-, any-, ang-) utawa tembung kriya lingga. Ciri-cirine, yaiku:

1)        Jejere nindakake pakaryan

2)        Wasesane kedadeyan saka tembung kriya linga utawa oleh ater-ater hanuswara (an-, am-, any-, ang-)

3)        Lesane dikenani pakaryan

4)        Bisa diwalik dadi ukara tanggap

Tuladha: Tari tuku bakwan ing warung Bu Jupi

B.     UKARA TANGGAP (PASIF)

Ukara tanggap yaiku ukara sing wasesane oleh ater-ater tripurusa (dak-, ko-, di-), ater-ater ka-, utawa seselan –in-.ciri-cirine yaiku:

1)   Jejere dikenani pagaweyan.

2)   Wasesane oleh ater-ater tripurusa (dak-, ko-, di-)

3)   Lesane nindakake pakaryan

4)   Bisa diwalik dadi ukara tanduk

Tuladha:

1)   Layange ditampa Rini.

2)   Segane wis dakpangan mau sore.

C.    TEMBUNG ANCER-ANCER

Tembung ancer-ancer yaiku tembung sing kanggo ngancer-anceri apa-apa mungguh ing : asale, enere, wektune, sababe utawa panggonane. Tembung ancer-ancer kayata: saka, menyang, ing, ana ing, dening, nganggo, kanthi, karo, kalawan.

Tuladha:

1)        Budi mulih saka mancing.

2)        Endhang lunga menyang Pasar Legi.

3)        Wiwit ing taun 2004 Indonesia dipimpin dening Presiden SBY.

D.    UKARA SAMBAWA

Ukara sambawa yaiku ukara sing isine awujud pangarep-arep. Lumrahe migunakake tembung sing mawa panambang (-a, utawa  -ana). Tuladha:

1)        Mlayua sing banter kareben ora ketututan kancane.

2)        Koktangisana truwelu sing mati kae, tetep ora bakal urip maneh.

E.     UKARA PITAKON

Ukara pitakon yaiku ukara kang isine awujud pitakonan. Ukara pitakon migunakake tembung 5W+1H: sapa, ing ngendi, kapan, apa, lan kepiye. Tuladha:

1)        Apa sing jalari banjir ing tlatah Semarang?

2)        Sapa sing dadi Presiden taun 2004?

3)        Kapan Hari Kebangkitan Bangsa dipengeti?