serat tripama

SERAT TRIPAMA

Serat Tripama anggitane Sri Mangkunagara IV awujud tembang Dhandhanggula. Kabehe ana 7 pada. Tripama: tri= telu, pama= tuladha, Tripama: paraga telu kang bisa dadi tuladha/conto.

Ing ngisor iki bakal diaturake rong pada wiwitan

1. Yogyanira kang para prajurit, lamun bisa sami anulada, kadya nguni caritane, andelira sang Prabu Sasrabahu, ing Mahispati, aran Patih Suwanda, lelabuhanipun, kang ginelung tri prakara, guna kaya purun ingkang den antepi, nuhoni trah utama.
2. Lire lelabuhan tri prakawis, guna bisa saniskareng karya, binudi dadi unggule, kaya sayektinipun, duk Bantu prang Magada nagri, amboyong putri dhomas , katur ratunipun, purune sampun tetela, aprang tandhing lan ditya Ngalengka aji, Suwanda mati ngrana.

(Serat Tripama, Sri Mangkunagara IV)

1. Tembang ing pada 1 lan 2 ing ndhuwur nyaritakake lelakone Raden Sumantri/ Patih Suwanda pinangka andel-andele Sang Harjuna Sasrabahu ing Mahispati kang mengkoni lan nuhoni watak telung prakara yaiku: guna , kaya, lan purun. Watak guna tegese pinter, lire tansah bisa mrantasi gawe. Kaya tegese sugih kaprawiran, buktine nalika mbantu perang Negara Magada Sumantri kasil mboyong putri dhomas (800) katur marang Sang Prabu Harjuna Sasrabahu. Purun tegese kendel, buktine nalika perang tandhing mungsuh Ratu Buta saka Ngalengka (Rahwana) Suwanda gugur ing palagan. Sanajan mangkonoa nanging Suwanda uga nduweni watak kang ora pantes ditiru yaiku : Melik nggendhong lali, Sumantri gelem masrahahkae Dewi Citrawati Sang Prabu Harjuna Sasrabahu yen Sang Prabu kuwawa ngalahake kridhane Raden Sumantri. Sumantri uga mentala lan tegel mateni adhine dhewe yaiku Sukrasana sing wis mbantu muter taman Sri Wedari.
2. Pada 3 lan 4 nyaritakake lelakone Kumbakarna. Senajan Kumbakarna awujud buta nanging nduweni watak satriya. Kumbakarna nalika didhawuhi maju perang dening Rahwana mungsuh wadyabala wanara dheweke saguh lan sumpah manawa anggone maju perang kasebut mung mligi mbelani nusa, bangsa lan negarane ora mbelani Rahwana kang angkara murka. Wasana Kumbakarna gugur ing paprangan.
3. Pada 5 lan 6 Nyaritakake lelakone Surya Putra ratu ing Ngawangga. Senajan Surya Putra iku karo Pandhawa isih sedulur beda bapak tunggal ibu, nanging Surya Putra ngabdi lan mbelani Sri Kurupati (Duryudana) ratu ing Hastina. Awit Suryaputra netepi sumpah satriyane lan kepengin males kabecikane Duryudana. Ing Perang Baratayuda Karna (Suryaputra) mungsuh Dananjaya (Arjuna). Karna gugur dipanah gulune dening Arjuna.